കൊണാട്ട് പ്ലേസിൽ സുരക്ഷ ശക്തമാക്കി; നഗരത്തിൽ പരിശോധനയും നിരീക്ഷണവും വർധിപ്പിച്ചു.
ന്യൂഡൽഹി: സിജെപിയുടെ (CJP) ‘ലഹ്റാ ദോ തിരംഗ’ മാർച്ചിന് മുന്നോടിയായി രാജ്യതലസ്ഥാനത്ത് സുരക്ഷ ശക്തമാക്കി. ഒക്ടോബർ 16ന് കൊണാട്ട് പ്ലേസിലെ സെൻട്രൽ പാർക്കിൽ നടത്താൻ നിർദേശിച്ചിരിക്കുന്ന മാർച്ചിന്റെ പശ്ചാത്തലത്തിൽ പൊലീസ് സേനയെയും കേന്ദ്ര സായുധ പൊലീസ് വിഭാഗങ്ങളെയും വിന്യസിക്കാൻ അധികൃതർ നടപടികൾ സ്വീകരിച്ചു.
കൊണാട്ട് പ്ലേസിലും സമീപപ്രദേശങ്ങളിലും നിരോധന ഉത്തരവുകൾ നിലവിലുണ്ട്. സെൻട്രൽ പാർക്ക് ഒക്ടോബർ 16, 17 തീയതികളിൽ പൊതുജനങ്ങൾക്കായി അടച്ചിടുമെന്ന് ന്യൂഡൽഹി മുനിസിപ്പൽ കൗൺസിൽ അറിയിച്ചു. രാജീവ് ചൗക്ക് മെട്രോ സ്റ്റേഷൻ ഉൾപ്പെടെയുള്ള പ്രധാന മേഖലകളിൽ നിരീക്ഷണവും സുരക്ഷാ പരിശോധനകളും ശക്തമാക്കിയിട്ടുണ്ട്.
സിജെപി നേതാക്കളായ സൗരവ് ദാസ്, ആശുതോഷ് റങ്ക എന്നിവരുടെ അറസ്റ്റിൽ പ്രതിഷേധിച്ചും മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുമാണ് മാർച്ചിന് ആഹ്വാനം ചെയ്തിരിക്കുന്നത്. വോട്ടർപട്ടികയിലെ പ്രത്യേക തീവ്ര പരിഷ്കരണവുമായി (SIR) ബന്ധപ്പെട്ട ക്രമക്കേടുകൾ നടന്നെന്ന ആരോപണവും പാർട്ടി ഉയർത്തുന്നുണ്ട്.
പ്രതിഷേധം കണക്കിലെടുത്ത് ഗതാഗത നിയന്ത്രണങ്ങൾക്കും ബാരിക്കേഡുകൾ സ്ഥാപിക്കുന്നതിനും പൊലീസ് പദ്ധതിയിട്ടിട്ടുണ്ട്. ക്രമസമാധാനവും പൊതുമുതലിന്റെയും സ്വകാര്യ സ്വത്തിന്റെയും സുരക്ഷയും ഉറപ്പാക്കുന്നതിനാണ് നടപടികളെന്ന് അധികൃതർ വ്യക്തമാക്കി.