റിയാദ്: സൗദി അറേബ്യക്കെതിരെ ആക്രമണം ശക്തമാക്കുമെന്ന് മുന്നറിയിപ്പ് നൽകി ഹൂതി വിമതർ. രാജ്യത്തെ വിമാനത്താവളങ്ങൾക്കും എണ്ണ ഉൽപ്പാദന കേന്ദ്രങ്ങൾക്കും നേരെ ആക്രമണം കടുപ്പിക്കുമെന്നാണ് പ്രഖ്യാപനം. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിനും എണ്ണശുദ്ധീകരണ ശാലയ്ക്കും നേരെ ബാലിസ്റ്റിക്, ക്രൂയിസ് മിസൈലുകളും ഡ്രോണുകളും ഉപയോഗിച്ച് ആക്രമണം നടത്തിയതിന് പിന്നാലെയാണ് മുന്നറിയിപ്പ്.

ധഹ്റാനിലെ സൗദി അരാംകോ ആസ്ഥാനത്തെ പ്രധാന കെട്ടിടത്തിനും ആക്രമണത്തിൽ നാശനഷ്ടമുണ്ടായതായി റിപ്പോർട്ടുകൾ വ്യക്തമാക്കുന്നു. സി.ഇ.ഒ അമീൻ നാസറിന്റെ ഓഫീസ് സ്ഥിതിചെയ്യുന്ന മുകളിലത്തെ മൂന്ന് നിലകൾക്ക് കേടുപാടുകൾ സംഭവിച്ചു. മേൽക്കൂരയും വാതിലുകളും തകർന്നതായാണ് റോയിട്ടേഴ്‌സ് റിപ്പോർട്ട്. ചെറിയ തീപിടിത്തമുണ്ടായെങ്കിലും ജീവനക്കാർക്ക് പരിക്കേറ്റിട്ടില്ലെന്നാണ് സൗദി ഊർജ മന്ത്രാലയത്തിന്റെ ഔദ്യോഗിക പ്രതികരണം.

കഴിഞ്ഞ ദിവസം റിയാദ് വിമാനത്താവളത്തിന് നേരെയുണ്ടായ ആക്രമണത്തിൽ 13 പേർ കൊല്ലപ്പെട്ടതായും റിപ്പോർട്ടുണ്ട്. ഗൾഫ് മേഖലയിൽ അമേരിക്കയും ഇറാനും തമ്മിലുള്ള സംഘർഷം രൂക്ഷമായതിനു പിന്നാലെയാണ് സൗദിയെ ലക്ഷ്യമിട്ടുള്ള ഹൂതി ആക്രമണങ്ങൾ വീണ്ടും ശക്തമായത്.

ആക്രമണങ്ങൾ തുടരാനുള്ള സാധ്യത ആഗോള എണ്ണവിപണിയിലും ആശങ്ക വർധിപ്പിച്ചിട്ടുണ്ട്. എണ്ണ ഉൽപ്പാദന കേന്ദ്രങ്ങൾക്കും ഗതാഗത സംവിധാനങ്ങൾക്കും നേരെയുണ്ടാകുന്ന ഭീഷണി രാജ്യാന്തര എണ്ണവിതരണത്തെ ബാധിക്കുമോയെന്ന ആശങ്കയും ശക്തമാണ്.