ഒരു സമൂഹത്തിന്റെ സംസ്കാരവും മാനവികതയും അളക്കേണ്ടത് അവിടുത്തെ വയോജനങ്ങൾ എത്രമാത്രം സുരക്ഷിതരും ആദരിക്കപ്പെടുന്നവരുമാണെന്നതിന്റെ അടിസ്ഥാനത്തിലാണ്.
ജീവിതത്തിന്റെ നല്ലൊരു പങ്ക് കുടുംബത്തിനും സമൂഹത്തിനും വേണ്ടി ചെലവഴിച്ചവർ വാർധക്യത്തിൽ അവഗണനയും ഒറ്റപ്പെടലും നേരിടേണ്ടിവരുന്നത് പരിഷ്കൃത സമൂഹത്തിന് ഒരിക്കലും ഭൂഷണമല്ല.
ഈ യാഥാർഥ്യം തിരിച്ചറിഞ്ഞുകൊണ്ട് കേരള സർക്കാർ നിയമസഭയിൽ അവതരിപ്പിച്ച വയോജന സംരക്ഷണ ബിൽ കാലം ആവശ്യപ്പെടുന്ന നിർണായകമായ ചുവടുവയ്പാണ്.
2026-ലെ കേരളം മുതിർന്ന പൗരന്മാരുടെ പരിചരണവും അവകാശസംരക്ഷണവും സംബന്ധിച്ച ബിൽ വയോജനങ്ങളുടെ ജീവിതത്തിന് കൂടുതൽ സുരക്ഷയും അന്തസ്സും ഉറപ്പാക്കാനുള്ള ലക്ഷ്യത്തോടെയാണ് മുന്നോട്ടുവച്ചിരിക്കുന്നത്.
വയോജനങ്ങളെ കുടുംബത്തിന്റെ ബാധ്യതയായി മാത്രം കാണാതെ അവകാശങ്ങളുള്ള പൗരന്മാരായി അംഗീകരിക്കുന്നു എന്നതാണ് ഈ നിയമനിർമാണ ശ്രമത്തിന്റെ ഏറ്റവും വലിയ പ്രസക്തി.
ശാരീരികവും മാനസികവുമായ പീഡനങ്ങൾ, അവഗണന, ഉപേക്ഷിക്കൽ, സാമ്പത്തിക ചൂഷണം, സ്വത്ത് തട്ടിയെടുക്കാനുള്ള സമ്മർദം എന്നിവയിൽനിന്ന് മുതിർന്നവരെ സംരക്ഷിക്കാൻ ശക്തമായ നിയമസംവിധാനം അനിവാര്യമാണ്.
ഇത്തരം അതിക്രമങ്ങൾക്ക് മൂന്നു വർഷംവരെ തടവുശിക്ഷ വ്യവസ്ഥ ചെയ്യാനുള്ള നിർദേശം വയോജനങ്ങളുടെ അവകാശങ്ങളെ ലഘുവായി കാണാൻ കഴിയില്ലെന്ന വ്യക്തമായ മുന്നറിയിപ്പാണ്.
വയോജന സംരക്ഷണത്തിനായി സംസ്ഥാനതലത്തിലും ജില്ലാതലത്തിലും പ്രത്യേക സംവിധാനങ്ങൾ രൂപീകരിക്കാനുള്ള നിർദേശവും ഈ ബില്ലിനെ കൂടുതൽ പ്രസക്തമാക്കുന്നു.
പരാതികൾ കേൾക്കാനും അന്വേഷിക്കാനും പരിഹാരം ഉറപ്പാക്കാനും ഉത്തരവാദിത്തമുള്ള സംവിധാനങ്ങളുണ്ടാകുമ്പോഴാണ് നിയമം സാധാരണക്കാരുടെ ജീവിതത്തിൽ യഥാർഥ മാറ്റമുണ്ടാക്കുക.
വയോജന പരിചരണകേന്ദ്രങ്ങളുടെ രജിസ്ട്രേഷൻ, പരിശോധന, നിരീക്ഷണം എന്നിവ ശക്തമാക്കാനുള്ള നീക്കവും സ്വാഗതാർഹമാണ്.
പരിചരണത്തിന്റെ പേരിൽ പ്രവർത്തിക്കുന്ന സ്ഥാപനങ്ങൾ തന്നെ ചൂഷണത്തിന്റെയും അവഗണനയുടെയും കേന്ദ്രങ്ങളായി മാറുന്ന സാഹചര്യം ഒരു കാരണവശാലും അനുവദിക്കരുത്.
വീട്ടിൽ കഴിയുന്ന വയോജനങ്ങൾക്ക് താങ്ങും പരിചരണവും ലഭ്യമാക്കുന്നതിനൊപ്പം, ആവശ്യമായവർക്ക് താങ്ങാനാകുന്ന ചെലവിൽ പരിചരണസേവനങ്ങൾ ഉറപ്പാക്കണമെന്ന സമീപനവും പ്രധാനമാണ്.
വയോജന വനിതകൾക്ക് മുൻഗണനാപരമായ സംരക്ഷണം, പൊതുസ്ഥലങ്ങളിൽ സുരക്ഷിതമായ പ്രവേശനം, സൗജന്യ നിയമസഹായം, ഡിജിറ്റൽ സേവനങ്ങളിലേക്കുള്ള പ്രവേശനം എന്നിവ ഉറപ്പാക്കാനുള്ള നിർദേശങ്ങൾ സാമൂഹിക നീതിയുടെ ഭാഗമാണ്.
കാഴ്ചക്കുറവ്, കേൾവിക്കുറവ്, ചലനപരിമിതി തുടങ്ങിയ ബുദ്ധിമുട്ടുകൾ നേരിടുന്നവർക്ക് ആവശ്യമായ സഹായോപകരണങ്ങൾ ന്യായമായ നിരക്കിൽ ലഭ്യമാക്കുന്നതും അവരുടെ സ്വതന്ത്രജീവിതത്തിന് കരുത്താകും.
വയോജനങ്ങൾ നേരിടുന്ന സൈബർ തട്ടിപ്പുകൾക്കും സാമ്പത്തിക ചൂഷണങ്ങൾക്കും എതിരെ വേഗത്തിലുള്ള ഇടപെടൽ ഉറപ്പാക്കേണ്ടതും ഇന്നത്തെ സാഹചര്യത്തിൽ അത്യന്താപേക്ഷിതമാണ്.
പരിചരണപ്രവർത്തകർക്ക് ഏകീകൃത പരിശീലനവും ശാസ്ത്രീയമായ പരിചരണരീതികളും നടപ്പാക്കാനുള്ള നിർദേശം വയോജന പരിചരണത്തെ കൂടുതൽ പ്രൊഫഷണലും ഉത്തരവാദിത്തമുള്ളതുമാക്കാൻ സഹായിക്കും.
ജപ്പാൻ, ജർമനി തുടങ്ങിയ രാജ്യങ്ങളിലെ മികച്ച പരിചരണരീതികൾ പഠിച്ച് അനുയോജ്യമായ മാതൃകകൾ സ്വീകരിക്കാനുള്ള സർക്കാർ നീക്കവും ദീർഘവീക്ഷണത്തിന്റെ തെളിവാണ്.
അതേസമയം, നിയമം കൊണ്ടുവരുന്നതുകൊണ്ടുമാത്രം വയോജനങ്ങളുടെ എല്ലാ പ്രശ്നങ്ങൾക്കും പരിഹാരമാകില്ലെന്ന യാഥാർഥ്യവും സർക്കാർ മറക്കരുത്.
പരാതികളിൽ സമയബന്ധിതമായ നടപടി, പരിചരണകേന്ദ്രങ്ങളിലെ നിരന്തര പരിശോധന, ആവശ്യമായ സാമ്പത്തിക സഹായം, തദ്ദേശസ്ഥാപനങ്ങളുടെ സജീവ പങ്കാളിത്തം എന്നിവ ഉറപ്പാക്കിയാലേ നിയമത്തിന്റെ ലക്ഷ്യം സാക്ഷാത്കരിക്കാനാകൂ.
മക്കളും ബന്ധുക്കളും വയോജനങ്ങളോടുള്ള ഉത്തരവാദിത്തം നിയമഭയത്തിന്റെ പേരിൽ മാത്രം നിറവേറ്റേണ്ട സാഹചര്യം ഉണ്ടാകാതിരിക്കാൻ കുടുംബബന്ധങ്ങളിലെ കരുതലും സാമൂഹിക ബോധവൽക്കരണവും ശക്തിപ്പെടുത്തണം.
വാർധക്യത്തെ നിസ്സഹായതയുടെ കാലമായി കാണാതെ അനുഭവസമ്പത്തും അറിവും സമൂഹത്തിന് പ്രയോജനപ്പെടുന്ന ജീവിതഘട്ടമായി പരിഗണിക്കേണ്ടതും അത്രതന്നെ പ്രധാനമാണ്.
വയോജനങ്ങളുടെ അനുഭവജ്ഞാനം തൊഴിൽ, സാമൂഹിക ഇടപെടൽ, പ്രാദേശിക വികസനം തുടങ്ങിയ മേഖലകളിൽ പ്രയോജനപ്പെടുത്താനുള്ള അവസരങ്ങൾ സൃഷ്ടിക്കുമ്പോൾ അവരുടെ ആത്മാഭിമാനവും സാമൂഹിക പങ്കാളിത്തവും വർധിക്കും.
ബിൽ നിയമസഭയിൽ അവതരിപ്പിച്ചതിന് പിന്നാലെ വിഷയസമിതിയുടെ പരിശോധനയ്ക്കായി അയച്ചിരിക്കുന്ന സാഹചര്യത്തിൽ, പൊതുജനാഭിപ്രായങ്ങളും വയോജനങ്ങളുടെ അനുഭവങ്ങളും വിദഗ്ധരുടെ നിർദേശങ്ങളും ഉൾക്കൊണ്ട് നിയമം കൂടുതൽ ശക്തമാക്കണം.
വയോജനങ്ങളുടെ സംരക്ഷണം ഒരു സർക്കാരിന്റെ മാത്രം ഉത്തരവാദിത്തമല്ലെങ്കിലും അതിനാവശ്യമായ നിയമപരവും ഭരണപരവുമായ അടിത്തറ ഒരുക്കുന്നതിൽ സർക്കാരിന് നിർണായക പങ്കുണ്ട്.
കേരള സർക്കാർ മുന്നോട്ടുവച്ച ഈ ബിൽ വേഗത്തിൽ ഗൗരവമായ പരിശോധനയിലൂടെ കടന്ന് പ്രായോഗികവും ഫലപ്രദവുമായ നിയമമായി മാറട്ടെ; വാർധക്യത്തിൽ ഓരോ മനുഷ്യനും ഭയമില്ലാതെ, അപമാനമില്ലാതെ, അന്തസ്സോടെ ജീവിക്കാനുള്ള അവകാശം ഉറപ്പാക്കുക എന്നതായിരിക്കണം അതിന്റെ അന്തിമലക്ഷ്യം.