തിരുവനന്തപുരം : മൊബൈൽ ഫോണുകളിൽ നിന്ന് രഹസ്യവിവരങ്ങൾ ചോർത്തിയെടുക്കുന്ന ചാര സോഫ്റ്റ്‌വെയർ കേരള പൊലീസ് ഉപയോഗിക്കുന്നില്ലെന്ന് ഉന്നത പൊലീസ് വൃത്തങ്ങൾ. സേന ഉപയോഗിക്കുന്നത് നിയമപരമായി അംഗീകരിക്കപ്പെട്ട ഡിജിറ്റൽ ഫൊറൻസിക് സോഫ്റ്റ്‌വെയറാണെന്നും കഴിഞ്ഞ 20 വർഷത്തോളമായി ഈ സംവിധാനം നിലവിലുണ്ടെന്നും പൊലീസ് വൃത്തങ്ങൾ വ്യക്തമാക്കി.
ഇസ്രയേൽ കമ്പനിയായ സെലിബ്രൈറ്റിന്റെ സോഫ്റ്റ്‌വെയർ കേരള പൊലീസ് ഉപയോഗിക്കുന്നുവെന്ന വാർത്തകൾക്കിടെയാണ് സേനയുടെ വിശദീകരണം. എൽഡിഎഫ് സർക്കാരിന്റെ കാലത്താണ് സോഫ്റ്റ്‌വെയർ വാങ്ങിയതെന്നും നിലവിലെ സർക്കാർ അതിന്റെ ലൈസൻസ് പുതുക്കി നൽകിയെന്നുമുള്ള രേഖകൾ പുറത്തുവന്നതോടെയാണ് വിവാദം ശക്തമായത്.
മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ ഡൽഹിയിൽ നടന്ന പ്രതിഷേധത്തിനിടെ അറസ്റ്റിലായ യൂട്യൂബർ ധ്രുവ് റാഠിയുടെ ഫോണിൽ നിന്ന് വിവരങ്ങൾ ചോർത്താൻ പൊലീസ് ശ്രമിച്ചെന്ന ആരോപണമാണ് സെലിബ്രൈറ്റ് സോഫ്റ്റ്‌വെയറിനെക്കുറിച്ചുള്ള ചർച്ചകൾക്ക് തുടക്കമിട്ടത്. ഡൽഹി പൊലീസ് ഫോണിലെ വിവരങ്ങൾ ശേഖരിക്കാൻ ശ്രമിച്ചെന്ന ധ്രുവ് റാഠിയുടെ ആരോപണം ഇന്റർനെറ്റ് ഫ്രീഡം ഫൗണ്ടേഷൻ പുറത്തുവിട്ടതോടെയാണ് വിഷയം ശ്രദ്ധ നേടിയത്. പിന്നാലെ കേരളം ഉൾപ്പെടെയുള്ള സംസ്ഥാന പൊലീസും കേന്ദ്ര അന്വേഷണ ഏജൻസികളും ഈ സോഫ്റ്റ്‌വെയർ ഉപയോഗിക്കുന്നുണ്ടെന്ന വിവരങ്ങളും പുറത്തുവന്നു.
എന്നാൽ, സെലിബ്രൈറ്റ് ചാരപ്രവർത്തനത്തിനുള്ള സംവിധാനമല്ലെന്നും കുറ്റകൃത്യങ്ങളുമായി ബന്ധപ്പെട്ട ഡിജിറ്റൽ തെളിവുകൾ ശേഖരിക്കുന്നതിനുള്ള ഫൊറൻസിക് ഉപകരണമാണെന്നുമാണ് കേരള പൊലീസിന്റെ വിശദീകരണം. വിവിധ കേസുകളിൽ അറസ്റ്റിലാകുന്ന പ്രതികളുടെ മൊബൈൽ ഫോണുകൾ പരിശോധിച്ച് കോടതിയിൽ ഹാജരാക്കേണ്ട ഡിജിറ്റൽ തെളിവുകൾ വീണ്ടെടുക്കാനാണ് ഇത് ഉപയോഗിക്കുന്നത്.
സോഫ്റ്റ്‌വെയർ കഴിഞ്ഞ സർക്കാരിന്റെ കാലത്താണ് വാങ്ങിയതെന്ന പ്രചാരണവും പൊലീസ് വൃത്തങ്ങൾ തള്ളി. ഏകദേശം രണ്ട് പതിറ്റാണ്ടായി കേരള പൊലീസിന്റെ ഫൊറൻസിക് പരിശോധനകളിൽ ഇത്തരം സാങ്കേതിക സംവിധാനങ്ങൾ ഉപയോഗിച്ചുവരുന്നുണ്ടെന്നും അധികൃതർ വ്യക്തമാക്കി.