ബോക്സ് ഓഫീസിൽ സിനിമ നേടുന്ന കോടികളുടെ കണക്കാണ് ഇന്ന് ഒരു ചിത്രത്തിന്റെ വിജയത്തിന്റെ പ്രധാന അളവുകോൽ. ഭാഷാഭേദമന്യേ രാജ്യത്തെ വിവിധ ഭാഗങ്ങളിൽ വമ്പൻ ചിത്രങ്ങൾക്ക് മികച്ച സ്വീകാര്യത ലഭിക്കുന്ന കാഴ്ചയാണ് സമീപകാലത്ത് കാണുന്നത്. ഇന്ത്യൻ സിനിമകൾക്ക് പുറമെ ഹോളിവുഡ് ചിത്രങ്ങളും ഇന്ത്യയിൽ മികച്ച കളക്ഷൻ നേടുന്നുണ്ട്.
ഈ പട്ടികയിലേക്ക് ഏറ്റവും ഒടുവിൽ ഇടംപിടിച്ച ചിത്രമാണ് ‘സ്പൈഡർമാൻ: ബ്രാൻഡ് ന്യൂ ഡേ’. റിലീസ് ചെയ്ത ആദ്യ ദിനം തന്നെ റെക്കോർഡ് കളക്ഷൻ നേടിയ ചിത്രം ഇന്ത്യയിലും വൻ കുതിപ്പാണ് തുടരുന്നത്. ചിത്രത്തിന്റെ ഇന്ത്യയിലെ വിതരണക്കാരായ സോണി പിക്ചേഴ്സ് ആണ് കളക്ഷൻ കണക്കുകൾ പുറത്തുവിട്ടത്.
ജൂലൈ 30ന് റിലീസ് ചെയ്ത ചിത്രം ആദ്യദിനം ഇന്ത്യയിൽ നേടിയത് 73 കോടി രൂപയായിരുന്നു. ഇന്ത്യയിൽ ഒരു ഹോളിവുഡ് ചിത്രം നേടുന്ന എക്കാലത്തെയും വലിയ ഓപ്പണിംഗ് കളക്ഷനാണിത്. എന്നാൽ ആദ്യദിന കളക്ഷനെ പോലും മറികടക്കുന്ന പ്രകടനമാണ് തുടർന്നുള്ള ദിവസങ്ങളിൽ ചിത്രം കാഴ്ചവെച്ചത്.
സോണി പിക്ചേഴ്സ് ഇന്ത്യ പുറത്തുവിട്ട ഏറ്റവും പുതിയ കണക്കുകൾ പ്രകാരം ചിത്രത്തിന്റെ ഇന്ത്യൻ ഗ്രോസ് കളക്ഷൻ 500 കോടി രൂപ പിന്നിട്ടു. നാലാം ദിനമായ ഞായറാഴ്ചയും ചിത്രത്തിന് മികച്ച ഒക്കുപ്പൻസിയാണ് ലഭിച്ചത്. പ്രമുഖ ടിക്കറ്റ് ബുക്കിംഗ് പ്ലാറ്റ്ഫോമായ ബുക്ക്മൈഷോയിൽ മണിക്കൂറിൽ 60,000ത്തിലധികം ടിക്കറ്റുകളാണ് ചിത്രത്തിനായി വിറ്റുപോകുന്നതെന്നാണ് റിപ്പോർട്ടുകൾ.
കൊളംബിയ പിക്ചേഴ്സ്, മാർവൽ സ്റ്റുഡിയോസ്, പാസ്കൽ പിക്ചേഴ്സ് എന്നിവയുടെ ബാനറിലാണ് ചിത്രം ഒരുങ്ങിയത്. ‘ഷാങ്-ചി ആൻഡ് ദി ലെജൻഡ് ഓഫ് ദ ടെൻ റിംഗ്സ്’ ഉൾപ്പെടെയുള്ള ചിത്രങ്ങൾ സംവിധാനം ചെയ്ത ഡെസ്റ്റിൻ ഡാനിയൽ ക്രെറ്റണാണ് ‘സ്പൈഡർമാൻ: ബ്രാൻഡ് ന്യൂ ഡേ’ സംവിധാനം ചെയ്തിരിക്കുന്നത്. ക്രിസ് മക്കെന്നയും എറിക് സോമേഴ്സും ചേർന്നാണ് തിരക്കഥ ഒരുക്കിയത്.
ടോം ഹോളണ്ടാണ് ചിത്രത്തിൽ സ്പൈഡർമാനായി എത്തുന്നത്. സെൻഡയ, സാഡി സിങ്ക്, ജേക്കബ് ബറ്റാലൺ, ജോൺ ബെർന്താൽ, ഫ്ലോറൻസ് പ്യൂ, ട്രാമെൽ ടിൽമാൻ, മരീസ ടൊമെയ്, മാർക്ക് റുഫലോ തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു.