RBI Reelathon 2026’ ബോധവത്കരണ ക്യാമ്പയിന് തുടക്കം
സൈബർ സാമ്പത്തിക തട്ടിപ്പുകളുടെ വർധിച്ചുവരുന്ന ഭീഷണിക്കെതിരെ കോളേജ് വിദ്യാർത്ഥികളെ ലക്ഷ്യമിട്ട് റിസർവ് ബാങ്ക് ഓഫ് ഇന്ത്യ തിരുവനന്തപുരം ആർ ബി ഐ റീലത്തോൺ 2026 എന്ന പേരിൽ സംസ്ഥാനതല ബൃഹത് ബോധവത്കരണ ക്യാമ്പയിന് തുടക്കമിട്ടു.
റിസർവ് ബാങ്ക് ഓഫ് ഇന്ത്യ, തിരുവനന്തപുരം ഓഫീസിൽ നടന്ന ഉദ്ഘാടന ചടങ്ങ് കേരള പോലീസ് ഡയറക്ടർ ജനറൽ ശ്രീ റവാഡ ചന്ദ്രശേഖർ ഐ.പി.എസ് ഉദ്ഘാടനം ചെയ്തു. സമ്മേളനത്തെ അഭിസംബോധന ചെയ്യവെ സൈബർ കുറ്റകൃത്യങ്ങളുടെ വർധിച്ചുവരുന്ന വ്യാപ്തിയിൽ അദ്ദേഹം ആശങ്ക രേഖപ്പെടുത്തി. സൈബർ തട്ടിപ്പുകൾ സാങ്കേതിക പ്രശ്നം മാത്രമല്ല, സമൂഹത്തിന്റെ എല്ലാ വിഭാഗങ്ങളെയും ബാധിക്കുന്ന ഗുരുതര സാമൂഹിക വെല്ലുവിളിയാണെന്നും അദ്ദേഹം പറഞ്ഞു. സാമ്പത്തിക നഷ്ടങ്ങൾക്കപ്പുറം, ഇരകൾക്കും അവരുടെ കുടുംബങ്ങൾക്കും ഉണ്ടാകുന്ന മാനസിക ആഘാതം, സമ്മർദ്ദം എന്നിവയാണ് ഇത്തരം കുറ്റകൃത്യങ്ങളുടെ യഥാർത്ഥ പ്രത്യാഘാതമെന്നും അദ്ദേഹം അഭിപ്രായപ്പെട്ടു.
വ്യാജ നിക്ഷേപ പദ്ധതികൾ, ഡിജിറ്റൽ അറസ്റ്റ് തട്ടിപ്പുകൾ, അനധികൃത വായ്പാ ആപ്പുകൾ, വ്യാജ തൊഴിൽ വാഗ്ദാനങ്ങൾ, മ്യൂൾ അക്കൗണ്ട് ശൃംഖലകൾ തുടങ്ങിയ ഉയർന്നുവരുന്ന സൈബർ ഭീഷണികളെക്കുറിച്ച് അദ്ദേഹം മുന്നറിയിപ്പ് നൽകി. സോഷ്യൽ എഞ്ചിനീയറിംഗിലൂടെയും ഡിജിറ്റൽ പ്ലാറ്റ്ഫോമുകളുടെ ദുരുപയോഗത്തിലൂടെയും യുവാക്കളെയാണ് സൈബർ കുറ്റവാളികൾ കൂടുതലായി ലക്ഷ്യമിടുന്നതെന്നും ഡി ജി പി പറഞ്ഞു. സൈബർ കുറ്റകൃത്യങ്ങൾ റിപ്പോർട്ട് ചെയ്യുന്നതിലെ ‘ഗോൾഡൻ മണിക്കൂറി’ ന്റെ പ്രാധാന്യം എടുത്തുപറഞ്ഞ അദ്ദേഹം, തട്ടിപ്പ് തിരിച്ചറിഞ്ഞ ഉടൻ തന്നെ ഔദ്യോഗിക സംവിധാനങ്ങളിലൂടെ പരാതി നൽകണമെന്ന് അഭ്യർത്ഥിച്ചു. ഇത് ഇടപാടുകൾ മരവിപ്പിക്കുന്നതിനും പണം വീണ്ടെടുക്കുന്നതിനുമുള്ള സാധ്യത ഗണ്യമായി വർധിപ്പിക്കുമെന്നും അദ്ദേഹം വ്യക്തമാക്കി. വിദ്യാർത്ഥികൾ സൈബർ സുരക്ഷാ അംബാസഡർമാരാകണമെന്നും അവരുടെ സർഗാത്മകതയും സാമൂഹിക സ്വാധീനവും ഉപയോഗപ്പെടുത്തി സൈബർ തട്ടിപ്പുകൾക്കെതിരെ ബോധവത്കരണം നടത്തണമെന്നും അദ്ദേഹം ആഹ്വാനം ചെയ്തു. മത്സരത്തിൽ നിന്നുയരുന്ന മികച്ച ബോധവത്കരണ ഉള്ളടക്കങ്ങൾ കേരള പോലീസിന്റെ ഔദ്യോഗിക സമൂഹമാധ്യമ പ്ലാറ്റ്ഫോമുകളിലൂടെ പ്രചരിപ്പിക്കുമെന്നും ശ്രീ റവാഡ ചന്ദ്രശേഖർ ഉറപ്പുനൽകി.
കേരളത്തിൽ അനധികൃത വായ്പാ ആപ്പുകളും മ്യൂൾ അക്കൗണ്ടുകളും ഉൾപ്പെടെയുള്ള സൈബർ സാമ്പത്തിക തട്ടിപ്പുകൾ തുടർച്ചയായി വർധിച്ചുവരുന്നതായി ആർബിഐ തിരുവനന്തപുരം റീജിയണൽ ഡയറക്ടർ ചൂണ്ടിക്കാട്ടി. വിദ്യാർത്ഥികളുടെ സർഗാത്മകതയെ പ്രയോജനപ്പെടുത്തി ജനങ്ങളിലേക്ക് എത്തിച്ചേരുന്ന ബോധവത്കരണ ഉള്ളടക്കം സൃഷ്ടിക്കുകയാണ് റീലത്തോണിന്റെ ലക്ഷ്യമെന്ന് അദ്ദേഹം പറഞ്ഞു. കോളേജുകളിലെ നേരിട്ടുള്ള ബോധവത്കരണ പരിപാടികളും സംസ്ഥാനതല റീൽ നിർമ്മാണ മത്സരവും സംയോജിപ്പിച്ചാണ് സൈബർ സാമ്പത്തിക തട്ടിപ്പുകൾക്കെതിരെ ദീർഘകാല ബോധവത്കരണം സൃഷ്ടിക്കുന്നതെന്നും അദ്ദേഹം അറിയിച്ചു.
ആർ ബി ഐ റീലത്തോൺ 2026 മൂന്ന് ഘട്ടങ്ങളിലായാണ് നടപ്പാക്കുന്നത്. ആദ്യഘട്ടത്തിൽ കേരളത്തിലെ ഏകദേശം 150 കോളേജുകളിൽ സ്മാർട്ട് ബോറോയിംഗ്, സുരക്ഷിത ഡിജിറ്റൽ ബാങ്കിംഗ് എന്നിവയെക്കുറിച്ചുള്ള ബോധവത്കരണ പരിപാടികൾ സംഘടിപ്പിക്കും. രണ്ടാം ഘട്ടത്തിൽ വിദ്യാർത്ഥികൾ അനധികൃത വായ്പാ ആപ്പുകൾ, മ്യൂൾ അക്കൗണ്ടുകൾ, സൈബർ സാമ്പത്തിക തട്ടിപ്പുകൾ, സൈബർ ഹൈജീൻ തുടങ്ങിയ വിഷയങ്ങളിൽ ഹ്രസ്വ വീഡിയോകളും റീലുകളും തയ്യാറാക്കി സമർപ്പിക്കും. വിവിധ ഘട്ടങ്ങളിലായുള്ള മൂല്യനിർണയത്തിന് ശേഷം തിരഞ്ഞെടുക്കപ്പെടുന്ന ടീമുകൾ ഈ വർഷാവസാനം നടക്കുന്ന ഗ്രാൻഡ് ഫിനാലെയിൽ പങ്കെടുക്കും.
മത്സരത്തിലെ ആദ്യ മൂന്ന് വിജയികൾക്ക് യഥാക്രമം ₹75,000, ₹50,000, ₹25,000 എന്നിങ്ങനെ പാരിതോഷികം ലഭിക്കും. മൂന്നാം ഘട്ടത്തിൽ വിജയിക്കുന്ന റീലുകൾ ആർബിഐയുടെ ഔദ്യോഗിക സമൂഹമാധ്യമ പ്ലാറ്റ്ഫോമുകളിലൂടെയും കേരള പോലീസിന്റെയും ബാങ്കുകളുടെയും കോളേജുകളുടെയും മറ്റ് പങ്കാളി സ്ഥാപനങ്ങളുടെയും സമൂഹമാധ്യമ ചാനലുകളിലൂടെയും വ്യാപകമായി പ്രചരിപ്പിക്കും.