തിരുവനന്തപുരം: ആസൂത്രണ ബോർഡ് പരീക്ഷയിലെ പത്ത് ചോദ്യങ്ങൾ മൂല്യനിർണയം നടത്താതെ ഒഴിവാക്കിയ സംഭവത്തിൽ തനിക്ക് പങ്കില്ലെന്ന് അഡീഷണൽ സെക്രട്ടറി ആർ. ഹരി ക്രൈംബ്രാഞ്ചിന് മൊഴി നൽകി. ചോദ്യങ്ങളുടെ മൂല്യനിർണയവുമായി ബന്ധപ്പെട്ട ചുമതല ഡെപ്യൂട്ടി സെക്രട്ടറി സതീഷിനായിരുന്നുവെന്നും ചോദ്യങ്ങൾ ഒഴിവാക്കിയ വിവരം അറിഞ്ഞിരുന്നില്ലെന്നുമാണ് ഹരിയുടെ വിശദീകരണം. എന്നാൽ ഈ മൊഴി ക്രൈംബ്രാഞ്ച് പൂർണമായി വിശ്വാസത്തിലെടുത്തിട്ടില്ലെന്നാണ് വിവരം.

പി.എസ്.സി ചെയർമാൻ എം.ആർ. ബൈജുവിന്റെ ഏകപക്ഷീയമായ തീരുമാനങ്ങളാണ് പരീക്ഷാ ക്രമക്കേടുകൾക്ക് വഴിവെച്ചതെന്നാണ് ക്രൈംബ്രാഞ്ചിന്റെ പ്രാഥമിക നിഗമനം. ചോദ്യങ്ങൾ തയ്യാറാക്കുന്നതിനുള്ള പാനൽ രൂപീകരിച്ചതും മൂല്യനിർണയം നടത്തുന്നവരെ തീരുമാനിച്ചതും ചെയർമാന്റെ നേതൃത്വത്തിലായിരുന്നുവെന്നാണ് പി.എസ്.സി അംഗങ്ങൾ മൊഴി നൽകിയിരിക്കുന്നത്. തീരുമാനങ്ങളിൽ ചെയർമാന്റെ ഏകപക്ഷീയ ഇടപെടലുകൾ ഉണ്ടായിരുന്നുവെന്നും അംഗങ്ങൾ അന്വേഷണസംഘത്തോട് വെളിപ്പെടുത്തിയിട്ടുണ്ട്.

ചെയർമാൻ എം.ആർ. ബൈജു സ്വന്തം ഇഷ്ടപ്രകാരമാണ് തീരുമാനങ്ങൾ എടുത്തിരുന്നതെന്ന് പി.എസ്.സി സെക്രട്ടറിയും നേരത്തെ മൊഴി നൽകിയിരുന്നു. തീരുമാനങ്ങൾ സംബന്ധിച്ച് വിവാദങ്ങളുണ്ടാകുമ്പോൾ ഉദ്യോഗസ്ഥരെ കുറ്റപ്പെടുത്തുന്ന രീതിയാണ് ചെയർമാന്റേതെന്നും സെക്രട്ടറിയുടെ മൊഴിയിലുണ്ട്. അഡീഷണൽ സെക്രട്ടറി ആർ. ഹരിയും ചെയർമാനും ചേർന്നാണ് പല തീരുമാനങ്ങളും എടുത്തിരുന്നതെന്നും എന്നാൽ പലപ്പോഴും കൂടിയാലോചനകളില്ലാതെയാണ് ചെയർമാൻ തീരുമാനങ്ങളെടുത്തിരുന്നതെന്നും സെക്രട്ടറി മൊഴി നൽകിയിട്ടുണ്ട്.

പരീക്ഷാ ക്രമക്കേടുമായി ബന്ധപ്പെട്ട് ഇത് രണ്ടാം തവണയാണ് പി.എസ്.സി സെക്രട്ടറി ചെയർമാനെതിരെ അന്വേഷണസംഘത്തിന് മൊഴി നൽകുന്നത്. മൊഴികളും മറ്റ് തെളിവുകളും പരിശോധിച്ചുവരുന്ന ക്രൈംബ്രാഞ്ച് ചെയർമാൻ എം.ആർ. ബൈജുവിനെ വീണ്ടും ചോദ്യം ചെയ്യാനൊരുങ്ങുകയാണ്. പരീക്ഷാ ക്രമക്കേടിൽ കൂടുതൽ ഉദ്യോഗസ്ഥരുടെ പങ്കുണ്ടോയെന്നും തീരുമാനങ്ങളെടുത്തതിൽ ആരുടെയൊക്കെ ഇടപെടലുണ്ടായിരുന്നുവെന്നും അന്വേഷണസംഘം പരിശോധിക്കുന്നുണ്ട്.