ന്യൂഡൽഹി: വിവോയുടെ ടി സീരീസിലേക്ക് പുതിയ 5ജി സ്മാർട്ട്ഫോൺ കൂടി എത്തുന്നു. വിവോ ടി5 5ജി ഉടൻ ഇന്ത്യൻ വിപണിയിലെത്തുമെന്ന് കമ്പനി സ്ഥിരീകരിച്ചു. കൃത്യമായ ലോഞ്ച് തീയതി ഇതുവരെ പ്രഖ്യാപിച്ചിട്ടില്ലെങ്കിലും ഫോണിന്റെ പ്രധാന സവിശേഷതകളെക്കുറിച്ചുള്ള വിവരങ്ങൾ വിവോ പുറത്തുവിട്ടുതുടങ്ങി. ഫ്ലിപ്കാർട്ടിലും ഫോണിനായി പ്രത്യേക ടീസർ പേജ് പ്രത്യക്ഷപ്പെട്ടിട്ടുണ്ട്. ഇതോടെ ഇന്ത്യയിലെത്തുന്ന വിവോ ടി5 5ജിയുടെ വിൽപ്പന ഫ്ലിപ്കാർട്ട് വഴിയും നടക്കുമെന്ന് വ്യക്തമായി.
ഡിസൈനിലും ഡിസ്പ്ലേയിലുമാണ് പുതിയ ഫോണിൽ വിവോ പ്രധാനമായും ശ്രദ്ധ നൽകിയിരിക്കുന്നത്. 34,999 രൂപ മുതൽ 49,999 രൂപ വരെയുള്ള വില വിഭാഗത്തിലെ ഏറ്റവും സ്ലിം ആയ 3ഡി കർവ്ഡ് ഡിസ്പ്ലേയാണ് വിവോ ടി5 5ജിയിൽ ലഭിക്കുകയെന്നാണ് കമ്പനിയുടെ അവകാശവാദം. വെറും 7.99 മില്ലിമീറ്റർ കനമുള്ള അൾട്രാ-സ്ലിം ബോഡിയാണ് ഫോണിനുണ്ടാകുകയെന്നും ടീസർ സൂചന നൽകുന്നു.
ആർട്ടിഫിഷ്യൽ ഇന്റലിജൻസിനും വിവോ ടി5 5ജിയിൽ കൂടുതൽ പ്രാധാന്യം നൽകിയിട്ടുണ്ട്. ജെൻഎഐ-റെഡി എൻപിയു ഫോണിൽ ഉൾപ്പെടുത്തുമെന്ന് കമ്പനി വ്യക്തമാക്കിയിട്ടുണ്ട്. എഐ അധിഷ്ഠിത പ്രവർത്തനങ്ങൾ കൂടുതൽ വേഗത്തിലും കാര്യക്ഷമമായും കൈകാര്യം ചെയ്യാൻ എൻപിയു സഹായിക്കുമെന്നാണ് വിവോ പറയുന്നത്.
സോഫ്റ്റ്വെയർ രംഗത്തും പുതിയ ഫോണിൽ ശ്രദ്ധേയമായ മാറ്റങ്ങളുണ്ടാകും. വിവോയുടെ ഒറിജിൻഒഎസ് ആയിരിക്കും ടി5 5ജിയിൽ ലഭിക്കുക. നിലവിലെ സൂചനകൾ പ്രകാരം ഒറിജിൻഒഎസ് 6 ആയിരിക്കും ഫോണിൽ പ്രവർത്തിക്കുക. എഐ അധിഷ്ഠിത ഫീച്ചറുകൾക്ക് കൂടുതൽ പ്രാധാന്യം നൽകുന്ന സോഫ്റ്റ്വെയർ അനുഭവമായിരിക്കും പുതിയ മോഡലിൽ പ്രതീക്ഷിക്കുന്നത്.
വിവോ ടി5 ലൈറ്റ് 5ജി, ടി5എക്സ് 5ജി, ടി5 പ്രോ 5ജി എന്നീ മോഡലുകൾക്ക് പിന്നാലെയാണ് സ്റ്റാൻഡേർഡ് ടി5 5ജി ഇന്ത്യൻ വിപണിയിലെത്തുന്നത്. ഇതോടെ രാജ്യത്തെ വിവോ ടി5 സീരീസിലെ മോഡലുകളുടെ എണ്ണം കൂടും.
അതേസമയം, ടി5 പ്രോ 5ജിയുടെ വിലയിൽ അടുത്തിടെ വർധനവ് രേഖപ്പെടുത്തിയിരുന്നു. 8 ജിബി റാം, 128 ജിബി സ്റ്റോറേജ് വേരിയന്റിന് നിലവിൽ 41,999 രൂപയാണ് വില. 8 ജിബി റാം, 256 ജിബി പതിപ്പിന് 46,999 രൂപയും 12 ജിബി റാം, 256 ജിബി ടോപ്പ് വേരിയന്റിന് 69,999 രൂപയുമാണ് വില.
വിവോ ടി5 5ജിയുടെ പ്രോസസർ, ക്യാമറ, ബാറ്ററി ശേഷി, ചാർജിങ് വേഗത, റാം-സ്റ്റോറേജ് വേരിയന്റുകൾ, കൃത്യമായ വില, ലോഞ്ച് തീയതി തുടങ്ങിയ വിവരങ്ങൾ കമ്പനി വരും ദിവസങ്ങളിൽ പ്രഖ്യാപിക്കുമെന്നാണ് പ്രതീക്ഷിക്കുന്നത്.