ദില്ലി: പരിക്കിനെ തുടർന്ന് ഒളിമ്പിക് മെഡൽ ജേതാവും ഇന്ത്യയുടെ ജാവലിൻത്രോ താരവുമായ നീരജ് ചോപ്ര ഈ സീസണിലെ ശേഷിക്കുന്ന മത്സരങ്ങളിൽ നിന്ന് പിന്മാറി. ജപ്പാനിൽ നടക്കുന്ന ഏഷ്യൻ ഗെയിംസ് ഉൾപ്പെടെയുള്ള പ്രധാന മത്സരങ്ങളിൽ ഇനി നീരജ് പങ്കെടുക്കില്ല.
ലുസെയ്ൻ ഡയമണ്ട് ലീഗിൽ 88.05 മീറ്റർ എറിഞ്ഞ് സീസണിലെ മികച്ച ദൂരം കണ്ടെത്തിയതിന് പിന്നാലെയാണ് നീരജിന് പരിക്കേറ്റത്. പരിശീലനത്തിനിടെ കണങ്കാലിലെ ലിഗമെന്റിനാണ് പരിക്കേറ്റതെന്ന് നീരജ് ഇൻസ്റ്റഗ്രാമിലൂടെ അറിയിച്ചു.
കഠിനാധ്വാനത്തിനൊടുവിൽ മികച്ച ഫോമിലേക്ക് തിരിച്ചെത്തുകയാണെന്ന് ലുസെയ്ൻ പ്രകടനത്തിന് ശേഷം തോന്നിയിരുന്നെങ്കിലും പരിശീലനത്തിനിടെയുണ്ടായ പരിക്ക് തിരിച്ചടിയായെന്ന് നീരജ് പറഞ്ഞു. ഡോക്ടർമാരുമായും ടീം അംഗങ്ങളുമായും ചർച്ച ചെയ്ത ശേഷമാണ് സീസണിലെ ബാക്കി മത്സരങ്ങളിൽ നിന്ന് വിട്ടുനിൽക്കാൻ തീരുമാനിച്ചതെന്നും അദ്ദേഹം വ്യക്തമാക്കി.
താളം കണ്ടെത്തുന്ന ഘട്ടത്തിൽ പരിക്കേറ്റത് നിരാശാജനകമാണ്. എന്നാൽ കായികജീവിതത്തിൽ തിരിച്ചടികൾ സ്വാഭാവികമാണെന്നും പൂർണ കായികക്ഷമത വീണ്ടെടുത്ത് കൂടുതൽ കരുത്തോടെ തിരിച്ചെത്തുകയാണ് ലക്ഷ്യമെന്നും നീരജ് പറഞ്ഞു.