തിരുവനന്തപുരം: ഓണം എത്തുംമുമ്പേ സർക്കാർ ജീവനക്കാർക്ക് സന്തോഷവാർത്ത. സർക്കാർ ജീവനക്കാർക്കും അധ്യാപകർക്കും ₹4,500 ഓണം ബോണസ് അനുവദിച്ച് സംസ്ഥാന സർക്കാർ ഉത്തരവിറക്കി. ബോണസിന് അർഹതയില്ലാത്ത ജീവനക്കാർക്ക് ₹3,000 പ്രത്യേക ഉത്സവബത്ത ലഭിക്കും.
സംസ്ഥാനത്തെ മുഴുവൻ സർക്കാർ ജീവനക്കാർക്കും ₹20,000 ഓണം അഡ്വാൻസും അനുവദിച്ചിട്ടുണ്ട്. ഈ തുക അഞ്ച് തുല്യ പ്രതിമാസ ഗഡുക്കളായി തിരിച്ചുപിടിക്കും. ഓണം അഡ്വാൻസിന്റെ വിതരണം ഓഗസ്റ്റ് 20 മുതൽ ആരംഭിക്കും.
ആറ് മാസം സേവനം പൂർത്തിയാക്കിയ കരാർ ജീവനക്കാർക്കും ഉത്സവബത്ത ലഭിക്കും. സർവീസ് പെൻഷൻകാർക്ക് ₹1,250 പ്രത്യേക ഉത്സവബത്ത നൽകും.
ആയമാർക്കും സ്കൂളുകളിലെ ഉച്ചഭക്ഷണ തൊഴിലാളികൾക്കും ₹1,550 വീതം ഉത്സവബത്ത ലഭിക്കും. ആശാ വർക്കർമാർ, അംഗൻവാടി ഹെൽപ്പർമാർ, ആയമാർ തുടങ്ങിയവർക്ക് ₹1,450 വീതവും ലഭിക്കും.
പാർട്ട് ടൈം ജീവനക്കാർക്കും സീസണൽ വർക്കർമാർക്കും ₹6,000 ഓണം അഡ്വാൻസ് അനുവദിച്ചിട്ടുണ്ട്.
ഓണം പ്രമാണിച്ച് സർക്കാർ ജീവനക്കാർക്കും പെൻഷൻകാർക്കും വിവിധ ആനുകൂല്യങ്ങൾ പ്രഖ്യാപിച്ചുകൊണ്ടാണ് ധനകാര്യ വകുപ്പ് ഉത്തരവിറക്കിയത്. ഓണത്തിന് മുമ്പ് തന്നെ അധിക സാമ്പത്തിക സഹായം ലഭിക്കുന്നത് ആയിരക്കണക്കിന് ജീവനക്കാർക്ക് ആശ്വാസമാകും.