തൃശ്ശൂർ: കുതിരാൻ തുരങ്കത്തിന്റെ പടിഞ്ഞാറൻ ഭാഗത്ത് ചെറിയ തോതിൽ മണ്ണിടിച്ചിൽ റിപ്പോർട്ട് ചെയ്തു. തുരങ്കത്തിന് മുകളിലെ രണ്ടിടങ്ങളിലാണ് മണ്ണ് ഇടിഞ്ഞത്. പ്രദേശത്ത് തുടരുന്ന കനത്ത മഴയെ തുടർന്ന് കൂടുതൽ മണ്ണിടിച്ചിലിനുള്ള സാധ്യതയുണ്ടെന്ന ആശങ്ക ഉയരുന്നുണ്ട്.
സംഭവമറിഞ്ഞ ഉടൻ ദേശീയപാതയിലെ ഹൈവേ കൺട്രോൾ റൂമിന്റെ പട്രോളിങ് സംഘം സ്ഥലത്തെത്തി പരിശോധന നടത്തി. നിലവിൽ ഗതാഗതത്തിന് തടസമൊന്നും റിപ്പോർട്ട് ചെയ്തിട്ടില്ലെങ്കിലും സ്ഥിതിഗതികൾ അധികൃതർ നിരീക്ഷിച്ചുവരികയാണ്.
പാലക്കാട്–തൃശ്ശൂർ ജില്ലകളെ ബന്ധിപ്പിക്കുന്ന പ്രധാന ദേശീയപാതയിലെ നിർണായക ഭാഗമാണ് കുതിരാൻ തുരങ്കം. മഴ ശക്തമായി തുടരുന്നതിനാൽ ഈ മേഖലയിലൂടെ യാത്ര ചെയ്യുന്നവർ ജാഗ്രത പാലിക്കണമെന്നും അധികൃതർ നിർദേശിച്ചു.