തിരുവനന്തപുരം: പസഫിക് സമുദ്രത്തിലെ ഡോൾഫിൻ കാലാവസ്ഥാ സ്വാധീനത്തിന്റെ ഭാഗമായി കേരളത്തിൽ വീണ്ടും മഴ സജീവമായി. ഇന്നലെ പകൽ പല ജില്ലകളിലും മഴയ്ക്ക് ശമനമുണ്ടായിരുന്നെങ്കിലും രാത്രിയോടെ വിവിധ പ്രദേശങ്ങളിൽ നേരിയതും ഇടിയോടുകൂടിയതുമായ മഴ ലഭിച്ചു. ഇന്ന് രാവിലെയും സംസ്ഥാനത്തിന്റെ വിവിധ ഭാഗങ്ങളിൽ മഴ തുടരുകയാണ്.
സംസ്ഥാനത്ത് ഇന്ന് കൂടുതൽ പ്രദേശങ്ങളിൽ മഴ ശക്തമാകാൻ സാധ്യതയുണ്ടെന്ന് കാലാവസ്ഥാ നിരീക്ഷണങ്ങൾ സൂചിപ്പിക്കുന്നു. അറബിക്കടലിൽ നിന്ന് ഈർപ്പമുള്ള കാലവർഷക്കാറ്റ് ശക്തമായി കടന്നുവരുന്നതും മഴ ശക്തിപ്പെടാൻ കാരണമാകുമെന്ന് വിലയിരുത്തുന്നു.
ഈ ജില്ലകളിൽ അതിശക്തമായ മഴയ്ക്ക് സാധ്യത
തൃശ്ശൂർ ജില്ലയുടെ തെക്കൻ മേഖലകൾ, എറണാകുളം, കോട്ടയം, പത്തനംതിട്ട, ഇടുക്കി ജില്ലയിലെ പടിഞ്ഞാറൻ മേഖലകൾ എന്നിവിടങ്ങളിൽ അതിശക്തമായ മഴയ്ക്ക് സാധ്യതയുണ്ട്.
അതേസമയം, മലപ്പുറം, കോഴിക്കോട്, പാലക്കാട്, കൊല്ലം ജില്ലകളിലെ ചില ഭാഗങ്ങളിലും ശക്തമായ മഴ ലഭിക്കുമെന്ന് മുന്നറിയിപ്പുണ്ട്.
കഴിഞ്ഞ ദിവസങ്ങളിലെ കനത്ത മഴയെ തുടർന്ന് വെള്ളക്കെട്ട് രൂക്ഷമായിരുന്ന കോട്ടയം ജില്ലയിൽ വെള്ളം ഇറങ്ങിത്തുടങ്ങിയതോടെ ഗതാഗതം സാധാരണ നിലയിലേക്ക് മടങ്ങിയിട്ടുണ്ട്.
ഇന്നും നാളെയും മഞ്ഞ അലർട്ട്
കേന്ദ്ര കാലാവസ്ഥാ വകുപ്പ് ഇന്ന് (ഓഗസ്റ്റ് 6) നാളെയും (ഓഗസ്റ്റ് 7) ശക്തമായ മഴയ്ക്ക് സാധ്യത കണക്കിലെടുത്ത് മഞ്ഞ അലർട്ട് പ്രഖ്യാപിച്ചു. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കാനാണ് സാധ്യത.
പൊതുജനങ്ങൾക്ക് ജാഗ്രതാ നിർദേശങ്ങൾ
- മലയോര മേഖലകളിൽ മണ്ണിടിച്ചിൽ, ഉരുൾപൊട്ടൽ, മലവെള്ളപ്പാച്ചിൽ സാധ്യതയുള്ളതിനാൽ അപകട മേഖലകളിലുള്ളവർ സുരക്ഷിത കേന്ദ്രങ്ങളിലേക്ക് മാറണം.
- ശക്തമായ കാറ്റിന് സാധ്യതയുള്ളതിനാൽ മേൽക്കൂര ബലഹീനമായ വീടുകളിൽ താമസിക്കുന്നവർ പ്രത്യേക ജാഗ്രത പാലിക്കണം.
- അപകടാവസ്ഥയിലുള്ള മരങ്ങൾ, വൈദ്യുതി പോസ്റ്റുകൾ, മതിലുകൾ, ബോർഡുകൾ എന്നിവ അധികൃതരുടെ ശ്രദ്ധയിൽപ്പെടുത്തണം.
- ശക്തമായ മഴയുള്ള സമയത്ത് നദികൾ മുറിച്ചുകടക്കുകയോ ജലാശയങ്ങളിൽ ഇറങ്ങുകയോ ചെയ്യരുത്.
- അനാവശ്യ യാത്രകൾ ഒഴിവാക്കുകയും വെള്ളച്ചാട്ടങ്ങൾ, ജലാശയങ്ങൾ, മലയോര മേഖലകൾ എന്നിവിടങ്ങളിലേക്കുള്ള വിനോദയാത്രകൾ മാറ്റിവെക്കുകയും ചെയ്യണം.
- ജലാശയങ്ങൾക്ക് സമീപമുള്ള റോഡുകളിലും അറ്റകുറ്റപ്പണികൾ നടക്കുന്ന റോഡുകളിലും അതീവ ജാഗ്രത പാലിക്കണം.
- തീരപ്രദേശങ്ങളിൽ കടലാക്രമണ സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണം.
- വൈദ്യുതി ലൈനുകൾ പൊട്ടി വീഴാൻ സാധ്യതയുള്ളതിനാൽ വെള്ളക്കെട്ടുകളിലൂടെ സഞ്ചരിക്കുന്നതിന് മുൻപ് സുരക്ഷ ഉറപ്പാക്കണം. അപകടസാധ്യത ശ്രദ്ധയിൽപ്പെട്ടാൽ കെ.എസ്.ഇ.ബി. 1912 എന്ന നമ്പറിൽ അറിയിക്കണം.
- അടിയന്തര സഹായങ്ങൾക്കായി 1077, 1070 എന്നീ ടോൾ ഫ്രീ നമ്പറുകളിൽ ബന്ധപ്പെടാം.
കാലാവസ്ഥാ മുന്നറിയിപ്പുകൾ തുടർച്ചയായി ശ്രദ്ധിക്കാനും ജില്ലാ ഭരണകൂടത്തിന്റെയും ദുരന്തനിവാരണ അതോറിറ്റിയുടെയും നിർദേശങ്ങൾ കർശനമായി പാലിക്കാനും പൊതുജനങ്ങളോട് അധികൃതർ അഭ്യർഥിച്ചു.